الخميس، 25 مارس 2021 11:57 ص

الفنانة التشكيلية فاطمة طاهر

فاطمة طاهر سيد عباس - 16 سنة

مصر/ القاهرة


"أنا بدأت أرسم أول مرة من ٢٠١٨ بالرغم من إن رسوماتي كانت بسيطة بس بابا كان مصدر تشجيعي وإلهامي؛ بابا بيجيبلي أدوات الرسم من أحسن الأنواع وساعات كنت بجمع فلوس من مصروفي وأشتري أدوات.

أول فترة كنت برسم بالرصاص.. فضلت أرسم بالرصاص ٣ شهور تقريبا لحد ما اشتريت علبة ألوان وبدأت أرسم بيها، كملت وبدأت أرسم بالفحم، ماكنتش باخد كورسات ولا بسمع فيديوهات على يوتيوب؛ بدأت أسمع فيديوهات في الفترة الأخيرة وفادتني جدا.

كنت بخاف يكون الرسم بيشغلني عن دراستي ومذاكرتي وخاصة إن انا في ثانوي، بس كان الرسم هو الطريقة الوحيدة اللي برفه بيها عن نفسي وبجدد حماسي للمذاكرة.. مش الرسم بس، كمان القراءة، بحب جدا القراءة في مجال التنمية البشرية.

للأسف عمري ما شاركت في معارض أو مسابقات رسم، الفترة اللي فاتت جربت حاجات كتير في الرسم وأنواع أدوات جديدة، كنت بعمل أوردرات رسم لزمايلي وفتحت صفحة (Aurora _ أورورا) على فيسبوك علشان أعرض عليها رسوماتي، عليها بعض أصدقائي وأقاربي.

الفترة اللي جاية أتمنى أحسن مستوايا في الرسم وأتمني أعلم الأطفال الرسم، وأتمنى صفحتي على فيسبوك يبقى عليها جمهور كبير وكل رسوماتي توصل لأكبر عدد من الناس.

أتمنى أشارك في مسابقات رسم علي مستوى الجمهورية وعلى مستوي العالم".